முதல் டெஸ்ட்: இந்திய அணி 246 ரன் சேர்ப்பு:வெ.இண்டீஸ் 34/1

கிங்ஸ்டன்: இந்தியா-வெஸ்ட் இண்டீஸ் அணிகளுக்கிடையேயான முதல் டெஸ்ட்டின் முதல் இன்னிங்ஸில் வெஸ்ட் இண்டீஸ் முதல் நாள் ஆட்டம் முடிவில் 1 விக்கெட் இழப்பிற்கு 34 ரன் எடுத்திருந்தது.முன்னதாக இந்‌தியா முதல் இன்னிங்ஸில் 246 ரன்னுக்கு ஆட்டமிழந்தது.வெஸ்ட் இண்டீஸ் அணிக்கு எதிரான முதல் டெஸ்ட் போட்டியில் திணறல் துவக்கம் கண்ட இந்திய அணி, தேநீர் இடைவேளைக்கு சற்று முன், முதல் இன்னிங்சில் 6 விக்கெட்டுக்கு 151 ரன்கள் எடுத்து இருந்தது.

வெஸ்ட் இண்டீஸ் சென்றுள்ள இந்திய அணி, மூன்று போட்டிகள் கொண்ட டெஸ்ட் கிரிக்கெட் தொடரில் பங்கேற்கிறது. இரு அணிகள் இடையிலான முதல் டெஸ்ட், கிங்ஸ்டன் ஜமைக்கா, சபினா பார்க் மைதானத்தில் நேற்று துவங்கியது. 

சீனியர் வீரர்கள் டிராவிட், லட்சுமண் மீண்டும் அணிக்கு திரும்பினர். தமிழக வீரர்கள் அபினவ் முகுந்த், முரளி விஜய் மற்றும் வேகப்பந்து வீச்சாளர் பிரவீண் குமார் ஆகிய மூவரும், அறிமுக வீரர்களாக களமிறங்கினர். "டாஸ் வென்ற இந்திய அணி கேப்டன் தோனி பேட்டிங் தேர்வு செய்தார்.

விஜய் ஏமாற்றம்:இந்திய அணிக்கு தமிழத்தின் முரளி விஜய், அபினவ் முகுந்த் இருவரும் இணைந்து துவக்கம் தந்தனர். முதல் டெஸ்ட்டில் களமிறங்கிய முகுந்த், பவுண்டரி அடித்து தனது ரன் கணக்கை துவக்கினார். ராம்பால் பந்தில் பவுண்டரி அடித்த முரளி விஜய் (8), அவரிடமே வீழ்ந்தார். நீண்ட நேரம் தாக்குப்பிடித்த முகுந்த் (11), கிடைத்த வாய்ப்பை வீணாக்கினார். 

150வது போட்டி:தனது 150 வது டெஸ்டில் களமிறங்கிய அனுபவ டிராவிட்டுடன், லட்சுமண் ஜோடி சேர்ந்தார். இருவரும் இணைந்து பொறுமையான ஆட்டத்தை வெளிப்படுத்தினர். மூன்றாவது விக்கெட்டுக்கு 34 ரன்கள் சேர்த்த நிலையில், லட்சுமண் (12), பிஷூ சுழலில் சிக்கினார். அடுத்து வந்த விராத் கோஹ்லி (4) நிலைக்கவில்லை. 

உணவு இடைவேளைக்கு பின், 40 ரன்கள் எடுத்த டிராவிட் அவுட்டானார். அதிகம் எதிர்பார்க்கப்பட்ட கேப்டன் தோனி, "டக் அவுட்டாகினார். பின் வந்த ஹர்பஜன் சிங், பிஷூ ஓவரில் அடுத்தடுத்து பவுண்டரிகள் விளாசினார். தொடர்ந்து இவர் ராம்பாலையும் விட்டுவைக்கவில்லை. இவரது ஓவரில் ஹர்பஜன், 3 பவுண்டரிகள் அடித்தார். 

மறுமுனையில் ரெய்னாவும், பிஷூ ஓவரில் 2 பவுண்டரிகள் அடிக்க, ஸ்கோர் வேகமாக உயர்ந்தது. 

தேநீர் இடைவேளைக்கு சற்று முன்பாக இந்திய அணி, முதல் இன்னிங்சில் 6 விக்கெட்டுக்கு 151 ரன்கள் எடுத்திருந்தது. ரெய்னா (25), ஹர்பஜன் சிங் (45) அவுட்டாகாமல் இருந்தனர். பின்னர் தொடர்ந்து ஆடிய இந்திய அணி இறுதியில் 246 ரன்னுக்கு ஆட்டமிழந்தது. அதிகபட்சமாக ரெய்னா 82, ஹர்பஜன் 70, மற்றும் டிராவிட் 40 ரன்னும் எடு்த்தனர். வெஸ்ட் இண்டீஸ் தரப்பில் எட்வர்ட்ஸ் 4 விக்கெட்டுகளும் ராம்பால் மற்றும் பிஷூ தலா 3 விக்கெட்டுகளை வீழத்தினர். பின்னர் களமிறங்கிய வெஸ்ட் இண்டீஸ் அணி முதல் இன்னிங்ஸில் முதல் நாள் ஆட்டம் முடிவில் 1 வி்‌க்கெட் இழப்பிற்கு 34 ரன் எடுத்திருந்தது. அந்த அணி 212 ரன் பின்தங்கி உள்ளது.